تعزية سمائية لأهالى شهداء نجع حمادى

وبعد ان كان العيد على جميعنا ليس فيه أى فرحة بسبب ما حدث كانت هناك تعزيات السماء تملأ قلوب المكلومين من الاباء والامهات وأعطاهم الرب العزاء وأمنا العدرا والقديسين لم يتركوهم وقد وصلتنى هذه الرسالة بالايميل ولما فيها من تعزية لنا جميعا احببت أن أشارككم بها

وصلتنى رسالة تعزية يا جماعة من صديق وهذا مضمونها

انا ليا صديقة من نجع حمادي
قالت انها ........اللى هقوله دة رسالة تعزية لكل الناس لازم توصل وتسرى وسطينا

رحت اعزى النهارده زمايلى اخوات الشهداء لأنهم فى نفس سنى تقريباً انا زرت تلات بيوت وكل بيت كنت بدخله كنت باخد شحنة تعزية وفرح مالهاش مثيل ومعرفش اوصفهالكم بجد

***********
اللى فرحنى فعلاً هو كم الفرح والتعزية اللى فيهم وملياهم

بيت الشهيد ابانوب كمال

شافوا امنا العذراءواقفة فوق الصناديق اثناء الصلاة فى شكل حمامة كبيرة وكمان شافوا نفس الحمامة معدية عند البيت تلات مرات رايحة جاية ومن وقتها حاسين بسلام وفرح مش عاوزة اقولكم فى البيت شكلهم ازاى

بيت الشهيد بولا عاطف

مامته شافتهم كلهم فى حلم لابسين ابيض وفرحانين وقالها ان فرحان ياماما ومبسوط جداً هنا وقالها بصى الجلابية بتاعتى مفيهاش بقع زى اصحابى علشان انتى فرحانة ومش بتبكى والبيت هناك عامل زى الكنيسة
ومامة بولا قالتلنا انها بعد ماسيدنا صلى صلاة التالت قامت زغرتت لانها بتقول كنت حاسة انى بحضر فرح بولا مش صلاة على روحه قامت زغرتت من الفرحة

بيت الشهيد بيشوى فريد

فرحانين جداً لان بيشوى كان خادم جميل وكمان اعترف واتناول قبل مايقابل المسيح وكان فى حياته على الارض زى الملاك
وهما شافوا الشهدا فى حضن الست العدرا

تفتكروا بعد دة كله كان ممكن ابقى ازاى انا بجد فرحانة جدا رحت اعزيهم انا اللى اتعزيت ربنا باعت تعزية رااااااائعة وجميلة لقلوبهم والعدرا الحنونة مش سايباهم

************

والسما مش سايبانا ولا ناسيانا كل الفترة اللى عدت من يوم ليلة العيد والسما ساندانا والعدرا معانا بتحرسنا
طفت حرايق كتير وانقذت ناس من الموت واقفة بتحرسنا وبتحمينا
العدرا وكل القديسين موجودين فى نجع حمادى لولاهم احنا كنا تعبنا كتير

رب المجد مش ناسينا ولا سايبنا رب المجد بيحبنا ولو مش بيحبنا مكنش بعتلنا الضيقة الجميلة دى ضيقة شبعتنا وفرحتنا وجمعتنا كلنا بقلب واحد ضيقة حركتنا وغيرتنا ومازالت

شكرا يا الهى على كل شىءواثقين انك معاناوحامينا
ان اخدوا جسدنا روحنا فايدك ومحدش يقدر ينزعها منك
وعدك حق يا إلهنا الحنان

وَعَلِّمُوهُمْ أَنْ يَحْفَظُوا جَمِيعَ مَا أَوْصَيْتُكُمْ بِهِ. وَهَا أَنَا مَعَكُمْ كُلَّ الأَيَّامِ إِلَى انْقِضَاءِ الدَّهْرِ». آمِينَ (مت 28 : 20)

متخفووووووووووووش
ربنا موجود

اذكرونى فى صلواتكم